Gunnar starfar sem prófessor við Raunvísindadeild Háskóla Íslands. Hann er hugmyndasmiður SmileyTutor, SmileyCoin, Menntun í ferðatösku og einn af stofnendum SmileyCharity. Hann byrjaði að þróa SmileyTutor fyrir um 25 árum og hefur gengið í öll verk síðan, allt frá forritun á SmileyCoin bálkakeðjunni í að skipuleggja sölu á dömubindum í SmileyStores og allt þar á milli.

Anna Helga starfar sem dósent við Raunvísindadeild Háskóla Íslands. Hún hefur starfað í verkefninu í um 15 ár. Hún er ein af stofnendum SmileyCharity og snúa hennar helstu verkefni að þróun og prófun á SmileyTutor. Uppáhalds verkefnin hennar eru þó ferðir til Kenía að hitta nemendur og SmileyGuides og verða vitni að því frábæra starfi sem samstarfsaðilar SmileyCharity vinna í Kenía.

Jamil Lentin er sjálfstætt starfandi hugbúnaðarverkfræðingur sem starfar sem Shuttle Thread í Bretlandi. Hann sérhæfir sig í þróun opins hugbúnaðar og er hann aðal forritari verkefnisins. Hann er ábyrgur fyrir þróun SmileyTutor og veitir ráðgjöf um vélbúnað og aðra tæknilega þætti. Jamie hefur að auki farið nokkrar ferðir til Kenía til að styðja við samstarfsaðila verkefnisins.

Bjarki er stærðfræðingur að mennt og er nú að vinna að meistaragráðu í tölfræði við Háskóla Íslands. Samhliða náminu hefur Bjarki unnið fjögur sumur í verkefninu. Hans helstu verkefni snúa að forritun á SmileyCoin bálkakeðjunni og vefveski SmileyCoin. Bjarki fór í sína fyrstu ferð til Kenía árið 2023 og verður það örugglega ekki sú síðasta.

 Kamau er stærðfræði- og eðlisfræðikennari og hefur hann kennt í árarðir í framhaldsskólum í Kenía. Hann er aðal tengiliður SmileyCharity í Kenía. Hann fer með með spjaldtölvur og veitir SmileyGuides stuðning í SmileyLibraries í Nairobi, Kajiado, Marsabit, Garissa, Turkana, Kiambu, Embu, Meru, Nakuru, Bungoma, and Makueni sýslunum.

Benta er menntaður kennari og starfar hún nú í Kakrigu Mfangano Primary School. Hún starfaði áður í Takawiri Primary School og er frábær árangur verkefnisins þar ekki síst henni að þakka en hún hefur einstakt lag á að hvetja nemendur áfram. Þegar nemendur eru farnir í framhaldsskóla koma þau til Bentu í skólafríum og vinna í SmileyTutor til að undirbúa sig fyrir háskólanám.

David er reyndur stærðfræði- og efnafræðikennari. Þekking hans á kennslufræðum ásamt góðri tækniþekkingu er verkefninu einstaklega mikilvæg. David er tengiliður verkefnisins við Challenge Aid sem reka óformlega skóla í stærstu og verstu fátækrahverfum í austur-Afríku, flesta í Nairobi. Nú eru 7 þessara skóla þátttakendur í verkefninu.

Buhashane sér um starfsemi verkefnisins á sjö stöðum innan Kakuma flóttamannabúðanna í norð-vestur hluta Kenía en þar búa um 200.000 flóttamenn, aðallega frá Suður-Súdan og Sómalíu. Hann er menntaður kennari og stofnandi Hope for Bright Africa.

Um 50 SmileyGuides vinna frábært starf á yfir 40 stöðum í Kenía og Eþíópíu. Þeirra helsta hlutverk er að styðja við bakið á nemendum og hvetja þau áfram í náminu. Mörg þeirra sjá einnig um SmileyStores þar sem nemendur geta keypt nauðsynjavörur, svo sem mat og dömubindi, fyrir SmileyCoin.